काठमाडौं । राष्ट्रिय परीक्षा बोर्डले कक्षा १२ को परीक्षाफल सार्वजनिक गरेसँगै बागलुङका विवेक पौडेल व्यवस्थापन (Management) संकायतर्फ उत्कृष्ट नतिजा ल्याएर नेपाल टपर बनेका छन्।
बागलुङ जिल्लाको जैमिनी नगरपालिका–२, टुनीबोट निवासी विवेक पौडेलले कक्षा १२ को परीक्षामा ३.९६ जीपीए प्राप्त गर्दै व्यवस्थापन संकायतर्फ देशकै उत्कृष्ट विद्यार्थीको रूपमा आफूलाई स्थापित गरेका हुन्। उनको उपलब्धिबारे पारिवारिक स्रोतले जानकारी दिएको छ।
यस वर्षको कक्षा १२ को परीक्षाफल परीक्षा सम्पन्न भएको करिब ४० दिनभित्रै सार्वजनिक गरिएको हो। राष्ट्रिय परीक्षा बोर्डका अनुसार परीक्षामा सहभागीमध्ये करिब ७० प्रतिशत विद्यार्थी उत्तीर्ण भएका छन्।
काठमाडौंस्थित काठमाडौं मोडेल माध्यमिक विद्यालय (KMC) मा अध्ययन गरेका विवेकले आफ्नो सफलता निरन्तर मेहनत, अनुशासन र नियमित अध्ययनको परिणाम भएको बताएका छन्। परिवारका सदस्यहरूले पनि उनको लगनशीलता, अध्ययनप्रतिको समर्पण र सकारात्मक सोचका कारण उत्कृष्ट नतिजा सम्भव भएको प्रतिक्रिया दिएका छन्।
विवेकको उपलब्धिले बागलुङसहित समग्र गण्डकी प्रदेशका विद्यार्थीलाई थप प्रेरणा दिएको छ। स्थानीय तहका जनप्रतिनिधि, शिक्षक तथा शुभेच्छुकहरूले उनलाई बधाई दिँदै आगामी शैक्षिक तथा व्यावसायिक यात्राका लागि शुभकामना व्यक्त गरेका छन्।
शिक्षा क्षेत्रमा उत्कृष्टता हासिल गरेका विवेक अब उच्च शिक्षामार्फत व्यवस्थापन तथा नेतृत्वको क्षेत्रमा थप योगदान पुर्याउने लक्ष्यमा रहेको बताइएको छ। उनको सफलताले ग्रामीण क्षेत्रबाट पनि राष्ट्रिय स्तरमा उत्कृष्ट नतिजा हासिल गर्न सकिने सन्देश दिएको छ।
प्रतिक्रिया दिनुहोस्