काठमाडौं । गत वर्ष बाढीपहिरोले क्षतिग्रस्त बनाएको बीपी राजमार्ग अझै पूर्ण रूपमा पुनर्निर्माण नहुँदै यस वर्ष पनि बाढी र पहिरोको असरमा परेको छ। दसैँ नजिकिँदै गर्दा राजमार्ग अवरुद्ध हुँदा यात्रुहरू वैकल्पिक मार्ग—मध्यपहाडी, मदन भण्डारी, कान्ति लोकमार्ग र नागढुंगा–मुग्लिन सडक—प्रयोग गर्न बाध्य भएका छन्।
सडक डिभिजन भक्तपुरका अनुसार राजमार्ग सञ्चालनका लागि मर्मत कार्य तीव्र गतिमा भइरहेको छ। प्रमुख इन्जिनियर योगेश सुमनका अनुसार चौकीडाँडा खण्डमा बिहीबारदेखि आवागमन सुरु गर्ने र शनिबारसम्म सम्पूर्ण राजमार्ग अस्थायी रूपमा सञ्चालनमा ल्याउने तयारी छ।
हाल चौकीडाँडामा नदी डाइभर्ट गरी अस्थायी डाइभर्सन निर्माण भइरहेको छ भने कटुञ्जेबेसी र कालढुंगा खण्डमा मर्मत सकिएको छ। प्रारम्भिक अनुमानअनुसार अस्थायी संरचना बगाउँदा करिब ३ करोड रुपैयाँ बराबरको क्षति भएको छ।
स्थायी पुनर्निर्माणका लागि २९.५ किलोमिटर सडक खण्डमध्ये ३ खण्डमा ठेक्का भइसकेको छ र १ खण्ड जापानी संस्था जाइकाले निर्माण गर्नेछ। बाँकी २.५ किमी खण्डको ठेक्का प्रक्रिया जारी छ।
चार ठेकेदार कम्पनीहरूले गरीबीबीचका खण्डहरू पुनर्निर्माण गर्दै छन्, जसको कुल लागत करिब ५ अर्ब रुपैयाँभन्दा बढी अनुमान गरिएको छ। दसैँपछि स्थायी संरचना निर्माण सुरु हुने सडक डिभिजनले जनाएको छ।
प्रतिक्रिया दिनुहोस्