काठमाडौँ, जेठ १९ – राप्रपा नेपालका अध्यक्ष कमल थापा आइतबार प्रहरीद्वारा पक्राउ परेपछि राप्रपाका अध्यक्ष राजेन्द्र लिङ्देनले कडा आपत्ति जनाएका छन्। थापाको गिरफ्तारी राजधानीको नारायणचौरमा भएको राजावादी प्रदर्शनका क्रममा बालुवाटारतर्फ जाँदै गर्दा भएको हो। प्रहरीले निषेधित क्षेत्र तोड्ने प्रयास भएको भन्दै थापासहित पाँच जना नेताहरूलाई नियन्त्रणमा लिएको जनाएको छ।
पक्राउको खबर बाहिरिएलगत्तै प्रदर्शनमा सहभागी राजावादी कार्यकर्ताहरू आक्रोशित बनेका छन्। उनीहरूले थापाको तत्काल रिहाइको माग गर्दै नक्सालस्थित प्रहरी प्रधान कार्यालय अगाडि धर्ना सुरु गरेका छन्। प्रदर्शनस्थलमै उपस्थित रहेका राप्रपा अध्यक्ष लिङ्देनले सरकारले धरपकडको नीति अख्तियार गरेको आरोप लगाउँदै थापाको अविलम्ब रिहाइको माग गरे। उनले चेतावनी दिंदै भने, “यदि थापालाई आजै रिहा गरिएन भने, आन्दोलन सोमबारदेखि थप सशक्त बनाइनेछ।”
राप्रपाले १५ जेठदेखि वर्तमान शासन व्यवस्था विरुद्धको आन्दोलन सुरु गरेको छ। राजसंस्थाको पुनःस्थापना, नेपाललाई पुनः हिन्दू राष्ट्र घोषणा गर्नुपर्ने लगायतका मागसहित गरिएको यो आन्दोलन क्रमशः चर्किंदै गएको छ। आइतबार पनि नारायणचौरबाट सुरु भएको राजावादी समूहको प्रदर्शन बालुवाटारतर्फ जाँदै थियो। प्रहरीका अनुसार, प्रदर्शनकारीहरूले बालुवाटार क्षेत्रतर्फ जबरजस्ती प्रवेश गर्न खोजेपछि बाध्य भएर थापा र अन्य नेताहरूलाई नियन्त्रणमा लिइएको हो। प्रहरीले उनीहरूलाई हाल जिल्ला प्रहरी परिसर, भद्रकालीमा राखिएको जनाएको छ।
राप्रपाका प्रवक्ता मोहन श्रेष्ठका अनुसार, थापासहित पक्राउ परेकाहरूको चाँडो रिहाइ नभए आन्दोलन अझ उग्र बनाइनेछ। श्रेष्ठले भने, “हामीले शान्तिपूर्ण धर्ना सुरु गरेका छौं, तर माग पूरा नभए आन्दोलन चर्काउनेछौं।” सरकारले यसअघि नै बालुवाटार क्षेत्रलाई निषेधित क्षेत्र घोषणा गरिसकेको थियो, जहाँ प्रधानमन्त्री, सभामुखलगायतका सरकारी उच्च पदाधिकारीहरूको निवास पर्दछ।
प्रतिक्रिया दिनुहोस्