काठमाडौं । नेपाल प्रिमियर लिग (एनपीएल) को तेस्रो संस्करणमा विदेशी खेलाडीको उल्लेख्य सहभागिताले नेपाली क्रिकेटको व्यावसायिक बजार विस्तार हुने अपेक्षा गरिएको छ। तर, विदेशी खेलाडीको बढ्दो उपस्थितिसँगै नेपाली खेलाडीले पर्याप्त अवसर पाउँछन् कि पाउँदैनन् भन्ने बहस पनि सुरु भएको छ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा सोमबारदेखि सुरु हुने प्रतियोगिताका लागि फ्रेन्चाइज टोलीहरूले विदेशी खेलाडी अनुबन्ध गर्ने प्रक्रिया पूरा गरेका छन्। विश्व क्रिकेटमा परिचित खेलाडीहरूको सहभागिताले प्रतियोगिताको आकर्षण बढाएको छ।
यसपटक मोइन अली, शाकिब अल हसन, डेविड वार्नर, आन्द्रे रसेल, एन्जेलो म्याथ्युज, स्कट कुगेलेइन, इफ्तिखार अहमद र फाबियन एलनजस्ता खेलाडी एनपीएलमा सहभागी हुने सूचीमा छन्। उनीहरूको उपस्थितिले नेपाली क्रिकेटलाई अन्तर्राष्ट्रिय स्तरमा चिनाउन, दर्शक आकर्षित गर्न र व्यावसायिक गतिविधि विस्तार गर्न सहयोग पुग्ने अपेक्षा गरिएको छ।
अघिल्ला संस्करणमा पनि विदेशी खेलाडीले सहभागिता जनाएका थिए। पहिलो संस्करणमा भारतीय खेलाडी शिखर धवनको आगमनले प्रतियोगितालाई थप चर्चामा ल्याएको थियो। यसपटक अन्तर्राष्ट्रिय क्रिकेट परिषद् (आईसीसी) को मान्यतासँगै विदेशी खेलाडीको सहभागिता थप व्यवस्थित भएको आयोजक पक्षको दाबी छ।
विदेशी खेलाडीको सहभागिताले बजार विस्तार
खेल समीक्षक तथा साहित्यकार रमेश रञ्जनले एनपीएलमा विदेशी खेलाडीको सहभागिताले प्रतियोगिताको अन्तर्राष्ट्रिय आकर्षण बढाए पनि भारतीय खेलाडीको न्यून उपस्थितिबारे प्रश्न उठाएका छन्। उनका अनुसार नेपालमा भारतीय क्रिकेट खेलाडीको लोकप्रियता उच्च छ र नेपाली खेलाडीले पनि उनीहरूबाट प्रेरणा लिँदै आएका छन्।
अग्रज खेल पत्रकार तथा समीक्षक मुकुन्द दाहाल विदेशी खेलाडीको सहभागितालाई सकारात्मक मान्छन्। तर, उनका अनुसार नेपाली प्रतिभाको दीर्घकालीन विकासका लागि स्पष्ट रणनीति आवश्यक छ।
विदेशी खेलाडीले मैदानमा प्रतिस्पर्धाको स्तर बढाउन र नेपाली खेलाडीलाई नयाँ अनुभव दिन सक्छन्। तर, विदेशी खेलाडी अनुबन्ध गर्ने र प्रतियोगितालाई व्यावसायिक बनाउने योजनासँगै घरेलु खेलाडीको क्षमता विकास गर्ने कार्यक्रम पनि उत्तिकै आवश्यक देखिन्छ।
अवसर कि घरेलु प्रतिभामाथि दबाब?
विदेशी खेलाडीको उपस्थितिबारे क्रिकेटका प्रशंसक तथा विश्लेषक सञ्जय ढुङ्गानाले नेपाली प्रतिभालाई प्राथमिकतामा राख्नुपर्ने बताएका छन्। उनका अनुसार विदेशी खेलाडीको लोकप्रियता र चमकले मात्रै नेपाली क्रिकेटको दीर्घकालीन समस्या समाधान गर्न सक्दैन।
नेपाल पत्रकार महासङ्घ धनुषाका अध्यक्ष पुरन गुप्ता भने एनपीएलमा विश्वस्तरीय खेलाडीको सहभागितालाई ऐतिहासिक अवसरका रूपमा हेर्छन्। उनका अनुसार यसले खेलकुद पर्यटन, अन्तर्राष्ट्रिय ब्रान्डिङ र नयाँ लगानी आकर्षित गर्न सहयोग पुर्याउन सक्छ।
सप्तरीका पूर्वखेलाडी मोहन मिश्र विदेशी खेलाडीसँग एउटै ड्रेसिङ रुममा बस्ने र मैदानमा प्रतिस्पर्धा गर्ने अवसर नेपाली खेलाडीका लागि महत्वपूर्ण सिकाइ भएको बताउँछन्। यद्यपि, निर्णायक भूमिकामा विदेशी खेलाडी हाबी भए घरेलु खेलाडीले आफ्नो क्षमता देखाउने अवसर गुमाउन सक्ने उनको चिन्ता छ।
सर्लाहीका क्रिकेट विश्लेषक विश्वमणि दाहाल भने विदेशी खेलाडीको सहभागितालाई न पूर्ण खतरा मान्नुपर्ने न त स्वतः उपलब्धि ठान्नुपर्ने बताउँछन्। उनका अनुसार प्रतियोगितामा एकैपटक चार जना विदेशी खेलाडी मात्रै मैदानमा उतार्न पाइने नियमले नेपाली खेलाडीका लागि अवसर कायम राखेको छ।
उनले विदेशी खेलाडीबाट प्राप्त अनुभवलाई नेपाली खेलाडीको सीप र क्षमता विकासमा रूपान्तरण गर्न सक्नुपर्नेमा जोड दिएका छन्।
व्यावसायिक सफलतासँगै नेपाली खेलाडीको भविष्य
एनपीएलको तेस्रो संस्करणले नेपाली क्रिकेटको व्यावसायिक विस्तार, व्यवस्थापकीय क्षमता र अन्तर्राष्ट्रिय पहिचान बढाउने सम्भावना बोकेको छ। विदेशी खेलाडीको लोकप्रियताले दर्शक, प्रायोजक र लगानीकर्ता आकर्षित गर्न सक्छ। तर, प्रतियोगिताको दीर्घकालीन सफलता नेपाली खेलाडीको विकासमा कति योगदान पुग्छ भन्ने कुराले पनि निर्धारण गर्नेछ।
विदेशी खेलाडीबाट सिक्ने अवसर, घरेलु खेलाडीलाई पर्याप्त खेल समय, प्रभावकारी प्रशिक्षण र युवा प्रतिभाको पहिचानलाई सँगसँगै अघि बढाउन सके एनपीएल नेपाली क्रिकेटका लागि महत्वपूर्ण माध्यम बन्न सक्छ।
विदेशी स्टारको चमकले प्रतियोगितालाई आकर्षक बनाउनु सकारात्मक हो। तर, त्यसको उज्यालोमा नेपाली प्रतिभा ओझेलमा पर्न दिनु हुँदैन। एनपीएलको वास्तविक उपलब्धि विदेशी खेलाडीको लोकप्रियतामा मात्र होइन, नेपाली क्रिकेटलाई दीर्घकालीन रूपमा बलियो बनाउन यसले पुर्याउने योगदानमा मापन हुनुपर्छ।
प्रतिक्रिया दिनुहोस्