काठमाडौं । रसुवाको भोटेकोशीमा आएको विनाशकारी बाढीका कारण आज अपराह्नसम्म एक हजार २९३ जनाको शव फेला परेको छ।
केन्द्रीय प्रहरी प्रवक्ता अविनारायण काफ्लेका अनुसार रसुवामा १४०, नुवाकोटमा १८६, धादिङमा ६५, चितवनमा ३५९, गोरखामा ७२, तनहुँमा ३८, नवलपरासी पूर्वमा २२१, नवलपरासी पश्चिममा १९४ तथा भारतमा फेला परेको १८ शव गरी कुल एक हजार २९३ शव फेला परेका हुन्। भारतमा फेला परेका शव नवलपरासी पश्चिममा बुझाइएको प्रहरीले जनाएको छ।
बाढीमा घाइते भएकामध्ये दुई जनाको उपचारका क्रममा मृत्यु भएको छ। उनीहरूमध्ये एक जनाको शिक्षण अस्पताल र अर्का एक जनाको राष्ट्रिय ट्रमा सेन्टरमा मृत्यु भएको प्रहरीले जनाएको छ।
फेला परेका शवको पहिचानका लागि डीएनए नमुना सङ्कलनलगायत आवश्यक प्रक्रिया पूरा गरी हालसम्म एक हजार ३० शव व्यवस्थापन गरिएको छ। व्यवस्थापन गरिएका शवमध्ये २२२ महिला, ३५५ पुरुष र ४५३ जनाको विवरण खुल्न नसकेको प्रहरीले जनाएको छ।
शव पहिचानका लागि मृतकका एक हजार २६० तथा आफन्तका ८४६ गरी कुल दुई हजार १०६ वटा डीएनए नमुना सङ्कलन गरिएको छ। पहिचान हुन नसकेका एक हजार २६३ शवको विवरण नेपाल प्रहरीको वेबसाइटमा राखिएको प्रवक्ता काफ्लेले जानकारी दिए।
बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि हालसम्म सात हजार ९१२ प्रहरी कर्मचारी परिचालन गरिएको छ। प्रहरीका अनुसार हालसम्म चार हजार ८९८ जना बेपत्ता छन्।
यस्तै, विभिन्न जिल्लामा रहेका होल्डिङ सेन्टरमा तीन हजार ६५५ जनालाई आश्रय दिइएको छ।
प्रहरीले बाढीको जोखिममा रहेका विभिन्न जिल्लाका परिवारलाई सुरक्षित स्थानमा सार्ने, विभिन्न निकाय तथा स्थानीयवासीको समन्वयमा उद्धार र खोजी गर्ने तथा बाढीका कारण अवरुद्ध भएका सडक खुलाउने कामसमेत जारी राखेको जनाएको छ।
प्रतिक्रिया दिनुहोस्