२०३० को विश्वकप खेल्ने नेयमारको संकेत, एआई भिडियोपछि बढ्यो समर्थकको आशा

सामाजिक सञ्जालमा भाइरल भएको भिडियोमा नेयमारका विभिन्न उमेरका स्वरूपबीच भावनात्मक संवाद देखाइएको छ। भिडियोको मुख्य सन्देश नेयमारलाई सन् २०३० को विश्वकपमा अन्तिम पटक मैदानमा उत्रेर विश्वकप जित्ने सपना पूरा गर्न प्रेरित गर्नु हो।

भिडियोमा सान्तोसको जर्सी लगाएका सानो नेयमारले भविष्यका नेयमारसँग ‘हामीले पहिलो विश्वकप कहिले जित्यौं ?’ भनेर प्रश्न गर्छन्। त्यसको जवाफमा भविष्यका नेयमारले आफूले अन्तिम थोपा पसिनासम्म प्रयास गरे पनि विश्वकप जित्न नसकेको र फेरि एकपटक प्रयास गर्न चाहेको भावुक अभिव्यक्ति दिन्छन्।

भिडियोको अन्त्यमा अझ वृद्ध नेयमारको हातमा ‘२०३०’ लेखिएको विश्वकप ट्रफी देखाइन्छ। त्यसपछि सानो नेयमारले ‘हो, अन्तिम पटक फेरि विश्वकप जित्ने प्रयास गर’ भन्ने संवाद बोल्छन्।

भिडियो सार्वजनिक भएपछि नेयमारले आफ्नो इन्स्टाग्राम स्टोरीमा तीनवटा प्रेम र भावनात्मक इमोजी पोस्ट गर्दै प्रतिक्रिया दिएका छन्। यही प्रतिक्रियाले समर्थकहरूबीच उनले २०३० को विश्वकप खेल्ने सम्भावनाबारे थप चर्चा चुलिएको हो।

सार्वजनिक भएको १२ घण्टाभित्रै भिडियोले ३ करोड ३० लाखभन्दा बढी भ्यु बटुलेको छ। साथै लाखौं लाइक, टिप्पणी र सेयर प्राप्त गर्दै यो भिडियो विश्वभर भाइरल बनेको छ।

यद्यपि, नेयमारले औपचारिक रूपमा सन् २०३० को विश्वकप खेल्ने निर्णय घोषणा गरेका छैनन्। त्यसैले अहिलेको चर्चा उनको सामाजिक सञ्जाल प्रतिक्रियाका आधारमा गरिएको अनुमान मात्र हो।