काठमाडौं । फुटबल इतिहासका सर्वकालीन महान् खेलाडीमध्ये एक क्रिस्टियानो रोनाल्डोको विश्वकप यात्रा अन्ततः उपाधिविहीन बनेर टुंगिएको छ। क्लब र राष्ट्रिय टोलीबाट सम्भवजसो सबै उपाधि जितेका रोनाल्डोले विश्व फुटबलको सबैभन्दा ठूलो ट्रफी भने कहिल्यै उचाल्न सकेनन्।
फिफा विश्वकप–२०२६ को अन्तिम १६ मा स्पेनसँग १–० ले पराजित भएपछि पोर्चुगल प्रतियोगिताबाट बाहिरिएको हो। अमेरिकाको डलासमा भएको प्रतिस्पर्धात्मक खेलको इन्जुरी समयमा मिकेल मेरिनोले गरेको निर्णायक गोलले स्पेनलाई क्वार्टरफाइनलमा पुर्यायो भने रोनाल्डोको विश्वकप जित्ने अन्तिम सपना पनि समाप्त भयो।
खेल सकिएलगत्तै ४१ वर्षीय रोनाल्डो भावुक बने। पाँच पटकका बालोन डी’ओर विजेता, पाँच पटकका यूईएफए च्याम्पियन्स लिग विजेता तथा सन् २०१६ को युरो कप विजेता रोनाल्डोले आफ्नो करियरमा लगभग सबै प्रमुख उपाधि जितेका छन्। उनी क्लब र राष्ट्रिय टोलीबाट ९७६ गोलसहित विश्व फुटबलकै सर्वाधिक गोलकर्ता हुन्। लगातार ६ वटा विश्वकपमा गोल गर्ने कीर्तिमान पनि उनकै नाममा छ।
यति धेरै सफलता र कीर्तिमानका बाबजुद विश्वकप उपाधि भने उनको हातबाट सधैं टाढै रह्यो। सन् २००६ को विश्वकपमा सेमिफाइनलसम्म पुग्नु नै उनको विश्वकप करियरको उत्कृष्ट उपलब्धि बन्यो।
यसअघि नै यो आफ्नो अन्तिम विश्वकप हुने घोषणा गरेका रोनाल्डोले खेलपछि राष्ट्रिय टोलीबाट भविष्यबारे तत्काल निर्णय नगर्ने संकेत दिए। उनले भने, “पहिले परिवारसँग भेट्छु, त्यसपछि शान्त मनले निर्णय लिन्छु।”
पोर्चुगलका मुख्य प्रशिक्षक रोबर्टो मार्टिनेजले पनि प्रतियोगितापछि पद छाड्ने घोषणा गर्दै रोनाल्डोको खुलेर प्रशंसा गरे। उनले विश्वकप जित्ने सपना पूरा नभए पनि टोलीप्रति रोनाल्डोले अन्तिम क्षणसम्म देखाएको समर्पण उदाहरणीय रहेको बताए।
करिब दुई दशकसम्म विश्व फुटबलमा प्रभुत्व जमाएका रोनाल्डोले व्यक्तिगत कीर्तिमानदेखि क्लब र महादेशीय सबै ठूलो उपाधि जिते। तर, फुटबल खेलाडीका लागि सबैभन्दा ठूलो सम्मान मानिने विश्वकप ट्रफी भने उनको करियरमा सधैं अपूरो सपना बनेर रह्यो। उनी विश्व फुटबलका महान् विजेता बने, तर विश्वकपविहीन महानायकका रूपमा इतिहासमा दर्ज भए।
प्रतिक्रिया दिनुहोस्