काठमाडौं – नेपालको निजी क्षेत्रको सबभन्दा ठूलो छाता संगठन नेपाल उद्योग वाणिज्य महासंघ (एफएनसीसीआइ) को नयाँ नेतृत्वले औपचारिक रूपमा कार्यभार सम्हालेको छ। संगठनको विधानअनुसार वरिष्ठ उपाध्यक्षबाट स्वतः अध्यक्ष बन्ने प्रावधानअनुसार अञ्जन श्रेष्ठले नयाँ अध्यक्षको जिम्मेवारी लिएका हुन्।
श्रेष्ठले शिथिल बनेको मुलुकको अर्थतन्त्रलाई गतिशील बनाउनु आफ्नो मुख्य प्राथमिकता रहेको बताएका छन्। उनले उद्योगी तथा व्यवसायीहरूका समस्या समाधान गर्न र लगानीमैत्री वातावरण निर्माणको लागि सरकारसँग बलियो पैरवी गर्ने प्रतिबद्धता व्यक्त गरे।
यसअघि, महासंघका निवर्तमान अध्यक्ष चन्द्रप्रसाद ढकालले आफ्नो तीन वर्षे कार्यकाल सफलतापूर्वक पूरा गरेर पद छाडेका छन्। ढकालको कार्यकालमा निजी क्षेत्रको साख अभिवृद्धि, वैदेशिक लगानीको पहल, तथा सरकार र निजी क्षेत्रबीचको समन्वयमा महत्वपूर्ण उपलब्धिहरू हासिल भएको चर्चा गरिएको छ। ढकालले सहयोग गर्ने सम्पूर्ण उद्यमी, व्यवसायी तथा सचिवालयका कर्मचारीहरूलाई धन्यवाद दिँदै नयाँ नेतृत्वलाई शुभकामना दिएका छन्।
नेपालको अर्थतन्त्रमा ८० प्रतिशतभन्दा बढी योगदान दिने निजी क्षेत्रको नेतृत्व संभालेसँगै व्यवसायीहरूमा नयाँ उत्साह थपिएको छ।
प्रतिक्रिया दिनुहोस्