काठमाडौं । हप्तामा दुई दिन सार्वजनिक बिदा दिने सरकारी निर्णयप्रति शिवले आपत्ति जनाएका छन्। उनले वर्तमान आर्थिक अवस्थालाई मध्यनजर गर्दै यस्तो निर्णयले अर्थतन्त्रमा नकारात्मक प्रभाव पार्ने चेतावनी दिएका छन्।
उनका अनुसार देश अहिले बेरोजगारी, महँगी र उत्पादनमा गिरावटजस्ता चुनौतीसँग जुधिरहेको अवस्थामा काम गर्ने दिन घटाउनु उपयुक्त हुँदैन। “काम घटाउने र बिदा बढाउने नीति अर्थतन्त्रका लागि घातक हुन सक्छ,” भन्दै उनले उत्पादन र श्रम बढाउनुपर्नेमा जोड दिएका छन्।
शिवले विकसित देशहरूसँग तुलना गर्नु उपयुक्त नहुने बताएका छन्। ती देशहरूमा उच्च प्रविधि, व्यवस्थित कार्यसंस्कृति र उच्च उत्पादकत्व भएकाले दुई दिन बिदा सफल भएको उल्लेख गर्दै उनले नेपालमा भने श्रमको पूर्ण उपयोग अझै हुन नसकेको तर्क गरेका छन्।
दुई दिन बिदाले सरकारी सेवा प्रवाहमा ढिलाइ आउन सक्ने, सर्वसाधारणले झन्झट भोग्नुपर्ने र प्रशासनिक प्रक्रिया सुस्त हुने जोखिम रहेको उनको भनाइ छ। यसले निजी क्षेत्रको लगानी र व्यवसायिक वातावरणमा समेत नकारात्मक असर पार्ने उनले बताए।
शिवले सरकारलाई उत्पादनमुखी क्षेत्रमा लगानी बढाउन, श्रमप्रति सम्मान गर्ने संस्कृतिको विकास गर्न, साना तथा मझौला उद्योगलाई प्रोत्साहन गर्न, प्रशासनिक सुधारमार्फत सेवा प्रवाह प्रभावकारी बनाउन र युवालाई स्वदेशमै रोजगारीका अवसर सिर्जना गर्न सुझाव दिएका छन्।
उनले देश निर्माणका लागि श्रम र उत्पादनलाई प्राथमिकता दिनुपर्ने बताउँदै लोकप्रियताका आधारमा निर्णय नगर्न सरकारलाई आग्रह गरेका छन्। “अहिलेको आवश्यकता बिदा होइन, सक्रियता हो,” उनको भनाइ छ।
प्रतिक्रिया दिनुहोस्