नेपाल र ओमानबीच आजको प्रतिस्पर्धा : उपाधि र विश्वकप दुबैको दाबेदारी

काठमाडौं । आइसिसी टी–२० विश्वकप एसिया तथा इस्ट एसिया प्यासिफिक छनोटको सुपर सिक्स चरणमा आज नेपालले घरेलु टोली ओमानसँग भिड्दैछ। खेल नेपाली समयअनुसार राति पौने ९ बजे अल अमिरातस्थित ओमान क्रिकेट एकेडेमीमा सुरु हुनेछ। ओमानलाई पराजित गर्न सके नेपालले आगामी टी–२० विश्वकपमा स्थान पक्का गर्ने सम्भावना बलियो हुनेछ। साथै, नेपाल उपाधिको पनि नजिक पुग्नेछ।

नेपाल लगातार दोस्रो र समग्रमा तेस्रो पटक टी–२० विश्वकपमा पुग्ने अभियानमा छ। सुपर सिक्समा दुवै टोली समान अंकमा छन्, तर ओमान रनरेटका आधारमा शीर्ष स्थानमा रहेको छ। आजको खेलले यी दुई अपराजित टिममध्ये एकको यात्रालाई रोक्नेछ। ओमान घरेलु टोली भए पनि दर्शक समर्थन नेपालकै पक्षमा हुने अपेक्षा गरिएको छ। विगतका खेल हेर्दा नेपाल ओमानभन्दा अगाडि रहेको छ—अहिलेसम्मका सात खेलमध्ये पाँचमा नेपाल विजयी भएको छ। तर हालको लयका आधारमा दुवै टोलीबीच रोमाञ्चक प्रतिस्पर्धा हुने अनुमान गरिएको छ।

यो प्रतियोगितामा ओमानले युएईसँग बाहेकका सबै खेल सहजै जितेको छ भने नेपालले अधिकांश खेलमा संघर्षपूर्ण जित हात पारेको छ। यूएई र कतारविरुद्धको कठिन परिस्थितिबाट जित निकाल्दै नेपालको पुनरागमनले विश्व क्रिकेट समुदायलाई प्रभावित पारेको छ। नेपालका सन्दीप लामिछाने, कुशल भुर्तेल, कप्तान रोहित पौडेल, गुल्सन झा र आसिफ शेखबाट आजको खेलमा विशेष प्रदर्शनको अपेक्षा गरिएको छ। पछिल्लो खेलमा सन्दीपले पाँच विकेट लिएपछि नेपालले कतारलाई पाँच रनले हराएको थियो।

बलिङ र फिल्डिङमा नेपाल उत्कृष्ट प्रदर्शन गरिरहे पनि ब्याटिङमा अझै सुधार आवश्यक देखिएको छ। मिडल ओभरमा सुस्त रन गति र कमजोर स्ट्राइक रेट मुख्य चुनौती बनेको छ। नेपालले सुपर सिक्सको अन्तिम खेल शुक्रबार सामोआसँग खेल्नेछ।