काठमाडौं : गृहमन्त्री रमेश लेखकले नेपाल नागरिकता (दोस्रो संशोधन) विधेयकले आमाको नामबाट पनि वंशजले नागरिकता पाउने प्रावधानलाई सुनिश्चित गरेको बताएका छन्।
बुधबार प्रतिनिधिसभा बैठकमा प्रस्तुत विधेयकबारे जानकारी दिँदै उनले भने, “यो ऐतिहासिक कदम हो। अब सन्तानले आमाकै नामका आधारमा नागरिकता प्राप्त गर्न सक्नेछन्। बाबुको पहिचान नभएको अवस्थामा समेत आमाको नामबाट नागरिकता दिने व्यवस्था विधेयकको मूल मर्म हो।”
विधेयकले १६ वर्ष नपुगेका नाबालकहरूका लागि पनि विशेष व्यवस्था गरेको छ। बाबु वा आमा मध्ये कम्तीमा एकजना नेपाली नागरिक भएमा उनीहरूले वैदेशिक यात्रामा सहजता ल्याउने गरी नाबालक परिचयपत्र प्राप्त गर्न सक्ने व्यवस्था गरिएको छ।
गृहमन्त्री लेखकका अनुसार संविधानको भावनाअनुसार कुनै पनि नेपाली नागरिक नागरिकताको अधिकारबाट वञ्चित नहुनेछन्। आमाबाट जन्मिएका सन्तानले आमाको नामबाट नागरिकता पाउने प्रावधान पूर्ण रूपमा कार्यान्वयन हुने र जन्मका आधारमा नागरिकता पाएका आमाबाबुका सन्तानले अङ्गीकृत नागरिकता प्राप्त गर्न सक्ने व्यवस्था गरिएको छ।
विद्यमान सामाजिक परिस्थितिलाई ध्यानमा राख्दै उनले वैदेशिक रोजगारीमा रहेका नेपाली महिलाका सन्तान नागरिकताविहीन हुने अवस्थालाई अन्त्य गर्न अङ्गीकृत नागरिकता दिन सकिने व्यवस्था पनि विधेयकमा समेटिएको बताए।
प्रतिक्रिया दिनुहोस्