काठमाडौं । नेपाल प्रिमियर लिग (एनपीएल) को तेस्रो संस्करण सोमबारदेखि कीर्तिपुरस्थित त्रिवि अन्तर्राष्ट्रिय क्रिकेट मैदानमा सुरु हुँदैछ। प्रतियोगिताको तयारी पूरा भएसँगै मैदानमा क्रिकेटप्रेमीको चहलपहल बढ्ने अपेक्षा गरिएको छ।
नेपाल क्रिकेट संघ (क्यान) ले आइतबार पत्रकार सम्मेलन गर्दै प्रतियोगिताबारे जानकारी दिएको छ। यस संस्करणमा एक महिनाको अवधिमा करिब डेढ अर्ब रुपैयाँ बराबरको आर्थिक कारोबार हुने अनुमान गरिएको छ।
प्रतियोगिताको विजेताले एक करोड ५० लाख रुपैयाँ पुरस्कार पाउनेछ। उपविजेताले ८० लाख, तेस्रो हुने टोलीले ४० लाख र चौथो हुने टोलीले ३० लाख रुपैयाँ प्राप्त गर्नेछन्।
यसपटकको एनपीएलमा प्रविधिको प्रयोग पनि थप गरिएको छ। अम्पायरको निर्णयमा चित्त नबुझे खेलाडीले रिभ्यु माग गर्न पाउनेछन्। एलबीडब्लूको निर्णयका लागि थ्रीडी बल ट्र्याकिङ तथा ब्याट र बलबीच सम्पर्क भए–नभएको पत्ता लगाउन एज डिटेक्सन र ध्वनि तरङ्ग प्रविधि प्रयोग गरिनेछ।
अन्तर्राष्ट्रिय क्रिकेट परिषद् (आईसीसी) बाट मान्यता प्राप्त गरेसँगै यस संस्करणका खेल अन्तर्राष्ट्रिय टी–२० मान्यताअनुसार सञ्चालन हुनेछन्। खेलाडीले बनाएका रन र लिएका विकेट अन्तर्राष्ट्रिय अभिलेखमा समेत समावेश हुनेछन्।
अघिल्लो संस्करणसम्म कीर्तिपुरस्थित त्रिवि क्रिकेट मैदानमा दर्शकदीर्घा र फ्लडलाइट जडान गरिएको थियो। यसपटक दर्शकका लागि थपिएका सुविधा र संरचनाले पनि प्रतियोगितालाई आकर्षक बनाउने अपेक्षा गरिएको छ।
एनपीएलको नयाँ संस्करणले नेपाली क्रिकेटको प्रतिस्पर्धात्मक स्तरसँगै व्यावसायिक गतिविधि र दर्शकको आकर्षण बढाउने अपेक्षा गरिएको छ।
प्रतिक्रिया दिनुहोस्