काठमाडौं । नेकपा (एमाले) संसदीय दलका नेता रामबहादुर थापा ‘बादल’ले प्रधानमन्त्री बालेन्द्र शाह नेतृत्वको सरकारको छमहिने कार्यशैलीप्रति असन्तुष्टि जनाउँदै सरकार फासीवादी मार्गमा अघि बढिरहेको आरोप लगाएका छन्।
शुक्रबार प्रतिनिधिसभाको बैठकमा बोल्दै बादलले पूर्वप्रधानमन्त्रीको गिरफ्तारीदेखि पछिल्ला राजनीतिक घटनाक्रमसम्मका विषय उठाउँदै सरकारको कार्यशैलीलाई ‘फासीवादी शासन’को संज्ञा दिएका हुन्।
सत्तापक्षले संसद्लाई केवल प्रतिछायाका रूपमा प्रयोग गरेको आरोप लगाउँदै उनले संसद्मा विधेयक निर्माण गर्दा प्रतिपक्षका सुझावलाई बेवास्ता गरिएको बताए। निर्वाचनमा आफ्नो दलले भोगेको पराजयलाई लोकतान्त्रिक अभ्यासका रूपमा स्वीकार गरेको उल्लेख गर्दै उनले त्यसलाई भविष्यमा विजय हासिल गर्ने अवसरका रूपमा लिएको बताए।
“पराजयको स्वीकारोक्ति आत्मसमर्पण होइन, हामीले यसलाई भावी विजयको अवसरका रूपमा लिएका छौँ,” उनले भने।
सरकारको छमहिने कार्यकालको समीक्षा गर्दै बादलले विधि निर्माण प्रक्रियामा सत्तापक्षले संकुचित सोच राखेको आरोप लगाए। संसद्मा दर्ता भएका दर्जनौँ विधेयकमा प्रतिपक्षका सुझाव समेट्नुको सट्टा सरकारले आफ्नो बहुमत र शक्तिका आधारमा निर्णय लादेको उनको दाबी थियो।
“लोकतान्त्रिक प्रक्रिया संवाद र सहमतिमा आधारित हुनुपर्नेमा सत्तापक्षले संख्या र शक्तिको दम्भमा विधेयकहरू पेलेर पारित गर्ने काम गरेको छ,” उनले भने।
बादलले सभामुखको भूमिकामाथि पनि प्रश्न उठाए। राजनीतिक सहमति कायम गर्न सभामुखले ठोस अगुवाइ गर्न नसकेको उनको भनाइ थियो। यद्यपि पछिल्लो समय सभामुखले प्रधानमन्त्रीलाई रुलिङ गर्ने प्रयास गर्नु र सत्तापक्षकै केही सांसदले सरकारको कार्यशैलीमाथि प्रश्न उठाउनु सकारात्मक संकेत भएको उनले बताए।
गत भदौ १० गतेको महाविपत्तिपछि राष्ट्रिय स्वतन्त्र पार्टीका सभापतिले सर्वपक्षीय संयन्त्र निर्माणका लागि गरेको पहलको स्वागत गर्दै बादलले संसदीय विशेष समितिमा राष्ट्रियसभालाई समावेश नगरिएको विषयमा आपत्ति जनाए। उनले राष्ट्रियसभालाई समेत समेटेर समिति गठन गर्नुपर्ने धारणा राखे।
सरकारको कार्यशैली, संसद्मा विधेयक पारित गर्ने प्रक्रिया र राजनीतिक सहमतिका विषयमा बादलले उठाएका यी प्रश्नहरू उनको राजनीतिक मूल्याङ्कन र आरोपका रूपमा आएका हुन्।
प्रतिक्रिया दिनुहोस्