काठमाडौं । स्वास्थ्य तथा खाद्य स्वच्छतामन्त्री निशा मेहताले सप्तरीको राजविराजस्थित गजेन्द्रनारायण सिंह अस्पताल परिसरबाहिर प्रसूति भएको घटनाको छानबिन भइरहेको बताएकी छन्। उनले अस्पतालको सेवा प्रवाहमा कमजोरी वा लापरबाही देखिए सम्बन्धितलाई कानुनबमोजिम कारबाही गरिने स्पष्ट पारेकी छन्।
प्रतिनिधिसभाको शुक्रबारको बैठकमा सांसदहरूले शून्य तथा आकस्मिक समयमा उठाएका प्रश्नको जवाफ दिँदै मन्त्री मेहताले घटनाबारे जानकारी पाएलगत्तै अस्पताल प्रशासनसँग २४ घण्टे स्पष्टीकरण माग गरिएको र अस्पतालबाट जवाफ प्राप्त भइसकेको जानकारी दिइन्।
उनका अनुसार घटनाको स्थलगत छानबिनका लागि नेपाल मेडिकल काउन्सिलका रजिष्ट्रार डा. सुप्रभात श्रेष्ठ र एथिकल कमिटीका डा. अजय शाहसहित पाँच सदस्यीय टोली राजविराज पुगेको छ। स्वास्थ्य सेवा विभागको उपचारात्मक सेवा महाशाखाका प्रमुख डा. पवनजङ्ग रायमाझी पनि टोलीमा सहभागी छन्।
जिल्ला प्रशासन कार्यालय, सप्तरीले समेत छुट्टै छानबिन समिति गठन गरेको मन्त्री मेहताले जानकारी दिइन्। घटनाका समयमा ड्युटीमा रहेका अस्पतालका कर्मचारीलाई तत्काल कामकाजबाट हटाएर छानबिन अघि बढाइएको उनको भनाइ छ।
मन्त्रीका अनुसार भदौ २४ गते बिहान करिब २ बजे ३० वर्षीया बबिताकुमारी पासवान प्रसव पीडामा अस्पताल पुगेकी थिइन्। प्रारम्भिक स्वास्थ्य परीक्षणपछि उनलाई प्रसूति वार्डमा भर्ना गरिएको थियो।
आवश्यक जाँचको रिपोर्ट उपलब्ध नभएकाले थप अत्यावश्यक परीक्षण गर्न सुझाव दिइएकोमा उनी र उनका कुरुवा अस्पतालले उपलब्ध गराएको श्ययामा नरही बाहिरिएको प्रारम्भिक विवरण प्राप्त भएको मन्त्रीले संसद्लाई जानकारी दिइन्। त्यसपछि बिहान करिब ४ः४५ बजे अस्पतालको मूल गेटबाहिर प्रसूति भएको उनको भनाइ थियो।
प्रसूति भएपछि आमा र नवजात शिशुलाई पुनः प्रसूति वार्डमा ल्याइएको र ड्युटीमा रहेका स्वास्थ्यकर्मीले आवश्यक उपचार तथा स्याहारका लागि अस्पतालमै रहन आग्रह गरेको भए पनि उनी अस्पतालबाट बाहिरिएको जानकारी प्राप्त भएको मन्त्री मेहताले बताइन्।
घटनाबारे जानकारी पाएलगत्तै मन्त्रालयले आमा र नवजात शिशुलाई खोजी गरी अस्पताल ल्याएर उपचार गर्न निर्देशन दिएको उनले बताइन्। हाल दुवैलाई अस्पतालको बेड नम्बर २२ मा राखेर स्वास्थ्यकर्मीको प्रत्यक्ष निगरानीमा उपचार तथा स्याहार भइरहेको र आमा तथा बच्चा दुवैको स्वास्थ्य अवस्था सामान्य रहेको उनले जानकारी दिइन्।
मन्त्री मेहताले सेवाग्राही अस्पताल परिसरबाहिर पुग्नुपर्ने अवस्था किन सिर्जना भयो र अस्पतालबाट प्रदान गरिएको सेवामा कुनै कमजोरी थियो वा थिएन भन्ने विषय छानबिनबाट तथ्यका आधारमा स्पष्ट हुने बताइन्।
मातृ तथा नवजात शिशुको जीवनरक्षा, सुरक्षित प्रजनन र गुणस्तरीय स्वास्थ्य सेवा सुनिश्चित गर्नु राज्यको प्राथमिक दायित्व भएको उल्लेख गर्दै उनले यस्ता घटना दोहोरिन नदिन सरकार गम्भीर रहेको बताइन्।
सरकारले आमा तथा नवजात शिशु सुरक्षा कार्यक्रममार्फत सरकारी स्वास्थ्य संस्थामा निःशुल्क प्रसूति सेवा उपलब्ध गराउँदै आएको उनले बताइन्। प्रसूति सेवाका लागि आवश्यक यातायात खर्चसमेत उपलब्ध गराउने व्यवस्था रहेको उनको भनाइ छ।
सरकारी स्वास्थ्य संस्थामा प्रसूति सेवा निःशुल्क हुँदाहुँदै कुनै शुल्क मागिएमा वा गर्भवती महिलालाई सेवा दिन अस्वीकार गरिएमा सम्बन्धित व्यक्तिमाथि प्रचलित कानुनअनुसार कारबाही गरिने मन्त्री मेहताले स्पष्ट पारिन्।
सुरक्षित मातृत्व हरेक आमाको अधिकार भएकाले कुनै पनि महिला प्रसव पीडामा स्वास्थ्य संस्थाको ढोकाबाहिर बस्नुपर्ने, सेवा नपाएर फर्किनुपर्ने वा असुरक्षित रूपमा प्रसूति हुनुपर्ने अवस्था आउन नदिने प्रतिबद्धता पनि उनले व्यक्त गरिन्।
प्रतिक्रिया दिनुहोस्