काठमाडौँ — गायक तथा संगीतकार हेमन्त कान्छा रसाइली र चर्चित गायिका रचना रिमालको स्वरमा सजिएको नयाँ रोमान्टिक गीत ‘चौतारीमा’ सार्वजनिक भएको छ। गीत रसाइलीको आधिकारिक युट्युब च्यानलमार्फत सार्वजनिक गरिएको हो।
आधुनिक र लोक संगीतको मिठास मिश्रण गरिएको ‘चौतारीमा’ गीतले नेपाली गाउँघरको चौतारीलाई प्रेम, सम्झना र भावनात्मक भेटघाटको प्रतीकका रूपमा प्रस्तुत गरेको छ। गीतका शब्द र संगीतले प्रेमी–प्रेमिकाबीचका आत्मीय पल, बिछोड र पुराना सम्झनालाई जीवन्त बनाउने प्रयास गरेका छन्।
हेमन्त कान्छा रसाइली र रचना रिमालको स्वर संयोजनलाई श्रोताहरूले सकारात्मक प्रतिक्रिया दिएका छन्। रचनाको मधुर स्वर र हेमन्तको भावपूर्ण प्रस्तुतीकरणले गीतलाई थप आकर्षक बनाएको सामाजिक सञ्जालमा देखिएको छ।
गीतको निर्देशन स्वयं हेमन्त कान्छा रसाइलीले गरेका हुन् भने छायांकन करण चैसरले गरेका छन्। सम्पादन तथा कलर ग्रेडिङ मिराज अर्यालले गरेका छन्। भिडियोमा नेपाली गाउँघरको परिवेश र चौतारीसँग जोडिएका भावनात्मक दृश्यहरूलाई आकर्षक रूपमा प्रस्तुत गरिएको छ।
गीत सार्वजनिक भएसँगै टिकटक, फेसबुक लगायत सामाजिक सञ्जालमा यसको चर्चा बढ्दो क्रममा रहेको छ। हेमन्त कान्छा रसाइली र रचना रिमालको यो सहकार्यले विशेषगरी युवा पुस्तामाझ राम्रो प्रभाव पार्ने अपेक्षा गरिएको छ।
प्रतिक्रिया दिनुहोस्