काठमाडौं । नेपाली कांग्रेसका महामन्त्री गगन थापा र विश्वप्रकाश शर्मा पार्टीभित्र देखिएको विवाद समाधानका लागि कानुनी परामर्शमा जुटेका छन्।
बुधबार बिहान महामन्त्रीद्वयले सभापति शेरबहादुर देउवासँग सहमति जुटाउने प्रयासस्वरूप छलफल गरेका थिए। तर उक्त छलफलबाट ठोस निष्कर्ष ननिस्किएपछि उनीहरू अहिले आफू निकट नेता तथा कानुन विज्ञहरूसँग परामर्शमा केन्द्रित भएका हुन्।
स्रोतका अनुसार, देउवासँगको छलफलमा प्रत्यक्षतर्फका उम्मेदवारको टिकट प्रक्रियामा अर्को नेताको हस्ताक्षर कानुनअनुसार मान्य हुने भए त्यसमा आफू तयार रहेको संकेत सभापतिले दिएका थिए। साथै, उनले यस विषयमा निर्वाचन आयोग तथा कानुन विज्ञसँग छलफल गरी उपयुक्त निर्णय लिन सुझाव दिएका थिए।
महामन्त्री थापा र शर्मा देउवासँग भएको वार्ताको निष्कर्षलाई व्यवहारिक र कानुनी रूपमा अघि बढाउने उपाय खोज्दै कानुनविद्हरूसँग निरन्तर छलफल गरिरहेका छन्।
काठमाडौंमा जारी कांग्रेसको दोस्रो विशेष महाधिवेशन अन्तर्गत नेतृत्व चयन र उम्मेदवारी प्रक्रियालाई लिएर पार्टीभित्र मतभेद देखिएपछि कानुनी परामर्शलाई महत्त्व दिइएको हो। नेताहरूका अनुसार, पार्टी विधान र कानुनी प्रावधानअनुसार समाधान खोज्ने प्रयास जारी छ।
महाधिवेशनसँग सम्बन्धित आगामी निर्णय र सहमतिले कांग्रेसको आन्तरिक राजनीति तथा नेतृत्व चयन प्रक्रियालाई निर्णायक दिशातर्फ लैजाने अपेक्षा गरिएको छ।
प्रतिक्रिया दिनुहोस्