नेपालले टी–२० विश्वकप एसिया–इस्ट एसिया प्यासिफिक छनोटको सुपर सिक्समा बुधबार ओमानलाई ३८ रनले पराजित गरेको छ । १ सय ५२ रनको लक्ष्य पछ्याएको घरेलु टोली ओमान ९ विकेट गुमाएर १ सय १३ रनमै समेटिँदा नेपालले प्रतियोगितामा लगातार तेस्रो जित दर्ता गर्यो । यो जितसँगै नेपाल ८ अंकसहित शीर्ष स्थानमा पुगेको छ, जबकि पहिलो हार बेहोरेको ओमान ६ अंकमा रोकिएको छ । नेपालले शुक्रबार हुने अन्तिम खेलमा सामाओलाई पराजित गरे प्रतियोगिता नै जित्नेछ ।
नेपाल र ओमान दुवै टोली बुधबारकै खेलअघि विश्वकपका लागि छनोट भइसकेका थिए । यससँगै नेपाल दोस्रो पटक लगातार र तेस्रो पटक समग्रमा टी–२० विश्वकपमा पुगेको छ । नेपालका बलरहरूले उत्कृष्ट प्रदर्शन गरे । सोमपाल कामीले तेस्रो ओभरमै ओमानका कप्तान जतिन्दर सिंहलाई आउट गर्दै उत्कृष्ट सुरुआत दिलाए । जतिन्दरले ११ बलमा १४ रन बनाए । अर्को ओभरमा नन्दन यादवले हमाद मिर्जालाई ४ रनमा पभेलियन फर्काए । अमिर कलिमलाई दीपेन्द्रसिंह ऐरीले सिधा थ्रोमा रनआउट गरे, जससँगै उनले लगातार पाँचौं खेलमा सिधा थ्रोमार्फत विकेट लिएका छन् ।
गुलशन झाले मोहम्मद नदिम र जितेन रामानन्दीलाई लगातार बलमा शून्यमा आउट गरे । नदिमले ३१ बलमा २५ रन र विनायक शुक्लाले सर्वाधिक ३२ रन बनाए । नेपालका तर्फबाट गुलशनले ४ ओभरमा ३१ रन खर्चेर ३ विकेट, नन्दन र सोमपालले २–२ विकेट र सन्दीप लामिछानेले १ विकेट लिए । पहिले ब्याटिङ गरेको नेपालले निर्धारित २० ओभरमा ९ विकेट गुमाएर १ सय ५१ रन बनायो — यो प्रतियोगितामा नेपालको सबैभन्दा उच्च स्कोर हो । कुशल भूर्तेल र आसिफ शेखले उत्कृष्ट सुरुआत गर्दै ८ ओभरमा ६१ रनको साझेदारी गरे ।
आसिफ २० बलमा २४ रन बनाए भने कप्तान रोहित पौडेल र दीपेन्द्रसिंह ऐरी दुवै सस्तैमा आउट भए । भूर्तेलले ५१ बलमा ६९ रन बनाउँदै उत्कृष्ट प्रदर्शन गरे । उनले ७ चौका र १ छक्का प्रहार गरे । अन्तिमतिर गुलशन झाले १० बलमा १८ रन जोडे भने नन्दन यादवले ४ बलमा ९ रन थपे । ओमानका बाँयाहाते स्पिनर नदिमले ४ ओभरमा २० रन खर्चेर ४ विकेट लिए । सुफियान र रामानन्दीले समान २–२ विकेट लिए ।
नेपालको यो जितसँगै टोलीले न केवल समूहमा अग्रता कायम राखेको छ, बरु टी–२० विश्वकप २०२६ का लागि आत्मविश्वासपूर्वक यात्रा अघि बढाएको छ ।
प्रतिक्रिया दिनुहोस्