ललितपुरको महालक्ष्मीस्थानस्थित मितेरी सेभिङ एन्ड क्रेडिट सहकारी ठगी प्रकरणको अनुसन्धान नेपाल प्रहरीको केन्द्रीय अनुसन्धान ब्युरो (सिआइबी) ले पूरा गरी बुधबार सहकारी वकिल कार्यालय, काठमाडौंमा प्रतिवेदन पेस गर्ने तयारी गरेको छ।
सिआइबीका अनुसार यस घटनामा ज्योतिबहादुर भण्डारी, सुवास खत्री, सुरेश अधिकारी, ज्योति गुरुङ, हितमान थापा र प्रकाश थापालाई प्रतिवादी बनाइएको छ। तर, यसै प्रकरणमा नाम जोडिएका नेपाली कांग्रेसका उपसभापति तथा सांसद धनराज गुरुङलाई भने संलग्नता नदेखिएको भन्दै प्रतिवादी नबनाई उन्मुक्ति दिइएको छ।
सिआइबीका प्रवक्ता एसपी युवराज खड्काका अनुसार प्रतिवादीहरूमाथि दाबी गरिने बिगो रकम चार अर्ब रुपैयाँभन्दा बढी हुने देखिएको छ। प्रतिवादीमध्ये ज्योतिबहादुर, सुवास र सुरेश पक्राउ परिसकेका छन् भने बाँकी तीन जना फरार छन्।
अनुसन्धानमा सुवास खत्री मुख्य योजनाकार रहेको पाइएको छ, जसले सहकारी ठगीसँगै हुन्डी र क्रिप्टो कारोबारमार्फत चार अर्ब रुपैयाँभन्दा बढी रकम चलाएको देखिएको छ। उनी विगतमा हुन्डी र नक्कली नोट प्रकरणमा समेत पक्राउ परिसकेका थिए।
ठगिनेहरूमा सहकारीका तत्कालीन अध्यक्ष कुम्भराज (केबी) गुरुङ र फरार अभियुक्त ज्योति गुरुङसमेत रहेका छन्। ज्योति गुरुङ, जो अहिले अमेरिकामा छन्, कांग्रेस उपसभापति धनराज गुरुङकी पूर्वपत्नी हुन्। उनीहरूले आफ्नो तथा माइतीको सम्पत्ति बेचेर समेत ठगीका योजनामा रकम जुटाएको अनुसन्धानमा खुलासा भएको छ।
धनराज र ज्योतिबीच २९ फागुन ०७६ मा सम्बन्धविच्छेद भए पनि सहकारीले यसलाई कागजी मात्रै भएको दाबी गर्दै आएको छ। सहकारीले यस दाबीको आधार ३ फागुन ०७७ मा धनराजले सहकारीबाट लिएको १२ लाख रुपैयाँ ऋणपत्रलाई मानेको छ, जसमा ज्योतिको नाम र धनराजको हस्ताक्षर रहेको छ।
संसद सदस्य सूर्य थापाको नेतृत्वमा बनेको उच्चस्तरीय छानबिन समितिले पनि यस विषयलाई पुष्टि गर्दै धनराजमाथि समेत छानबिन गर्न सरकारलाई सिफारिस गरेको थियो।
प्रतिक्रिया दिनुहोस्