२० असार, सुर्खेत । जाजरकोट जिल्लाको कुशे गाउँपालिका–३ स्थित तर्पेना भन्ने स्थानमा भिरमाथिबाट खसेको ढुङ्गा लागेर एकै घरका दुई किशोरीको ज्यान गएको छ। अस्थायी टहरामा सुतिरहेका दिदी–बहिनीको ढुङ्गा लागेर घटनास्थलमै मृत्यु भएको हो। मृत्यु हुनेमा सोही ठाउँका नरबहादुर बुढाका छोरीहरू १८ वर्षीया शर्मिला बुढा र १४ वर्षीया चमेली बुढा रहेका छन्। उनीहरू दुवै जना भूकम्पपीडितका लागि बनाइएको अस्थायी टहरामा सुतिरहेका बेला राति करिब ९ बजेको समयमा माथिबाट खसेको ढुङ्गा लागेर ज्यान गएको वडाध्यक्ष वीरबहादुर बुढाले जानकारी दिएका छन्।
दुवै जना परिवारको बाख्रा हेरचाह गर्नका लागि उक्त स्थानमा बनेको टहरामा बसिरहेका थिए। गाउँ नजिकैको भिरालो भूभागमा अवस्थित टहरामा उनीहरू सुतिरहेका बेला अचानक ठूलो आवाजका साथ ढुङ्गा खसेको र ढुङ्गा सोझै टहरामा लागेर दुवैलाई च्यापेको बताइएको छ। घटनापछि स्थानीयबासी र प्रहरीको टोली घटनास्थलमा पुगेको थियो। सुरक्षाकर्मीहरूले घटनाको प्रारम्भिक अनुसन्धान सुरु गरेका छन् भने शवलाई पोस्टमार्टमका लागि अस्पताल ल्याउने तयारी भइरहेको प्रहरीले जनाएको छ।
स्थानीय वासिन्दाका अनुसार घटनास्थल भिरालो जमिनमा रहेको र त्यहाँ पहिरोको जोखिम रहँदै आएको क्षेत्र हो। तर रातको समयमा यस्तो अप्रत्याशित रूपमा ढुङ्गा खसेर ज्यान जाने घटना दुखद र दुर्भाग्यपूर्ण भएको भन्दै स्थानीयहरू शोकमा डुबेका छन्। जाजरकोट जिल्ला भूकम्पपीडित क्षेत्रमध्ये पर्छ, जहाँ भूकम्पपछि बनाइएका अस्थायी टहरा अझै प्रयोगमा छन्। तर यस्ता टहरा प्राकृतिक जोखिमयुक्त स्थानहरूमा रहेका कारण दुर्घटनाको जोखिम पनि उत्तिकै रहेको स्थानीय जनप्रतिनिधिहरूले बताएका छन्।
प्रतिक्रिया दिनुहोस्